Цягам апошняга кварталу колькасьць адрасоў інтэрнэтных старонак з нацыянальным дамэнам верхняга ўзроўню для Польшчы (.pl.) вырасла на 250 тысяч. Польшча надалей зьяўляецца лідарам у Эўразьвязе па рэгістрацыі інтэрнэтных старонак у сеціве. Горш, чым палякі па гэтаму пытаньню выпадаюць гішпанцы й партугальцы.
Дамэннае імя (дамэн) служыць для адрасацыі вузлоў сеткі Інтэрнэт і разьмешчаных на ім сеткавых рэсурсаў (вэб-сайтаў, сэрвэраў электроннай пошты, сеткавых сэрвісаў) у зручнай для чалавека форме.
Як паясьняе Ізабэля Дамагала з Аддзелу навуковай і акадэмічнай кампутарных сеткаў (NASK), цягам апошніх некалькіх гадоў утрымліваецца тэндэнцыя росту ў выкарыстаньні нацыянальнага дамэннага імя. У ейнай ацэнцы, гэта вынік некалькіх паказчыкаў.
Ізабэля Дамагала: Мы задаволеныя гэтым разьвіцьцём. Усё больш асоб у Польшчы карыстаецца Інтэрнэтам. Апрача таго, павялічваецца сьвядомасьць палякаў, што варта зарэгістраваць адрас з нацыянальным дамэнам. Да гэтага прычыніліся таксама грамадзкія кампаніі, якія праводзілі партнэры NASK. Тым ня менш, паводле мяне, найважнейшы ўплыў на сытуацыю мае сьвядомасьць інтэрнэт-карыстальнікаў.
- лічыць Ізабэля Дамагала з Аддзелу Навуковай і акадэмічнай кампутарных сеткаў.
Да паловы бягучага году былі зарэгістраваныя больш за 2 мільёны адрасоў з дамэнам .pl. Як прагназуюць спэцыялісты, згаданая тэндэнцыя да росту будзе ўтрымлівацца. Апрача таго, усё больш суб’ектаў з па-за Польшчы таксама рэгіструе назвы з дамэнным імем .pl.
Кіраўнік Аддзелу дамэнаў NASK Артур Пехаціньскі лічыць, што гэта таксама спосаб інвэставаньня ў новыя тэхналёгіі. У бліжэйшым часе будзе ўведзена некалькі мэханізмаў, якія павінны павысіць узровень бясьпекі старонкаў ды асоб, якія карыстаюцца старонкамі з нацыянальным дамэнам Польшчы.
Артур Пехаціньскі: Гаворка ідзе пра тое, каб інтэрнэт-карыстальнікі былі ўпэўненыя, што, напрыклад, старонка банку, якой яны карыстаюцца, сапраўдная ды падчас уваходу на яе ніхто не скрадзе іхных дадзеных.
- кажа Артур Пехаціньскі.
Нагадваем, нацыянальнае дамэннае імя Польшчы - .pl. было прынятае ў 1990 годзе. У згаданым годзе былі зарэгістраваныя першыя адрасы старонак са згаданым дамэнам. Адрасамі з дамэнам .pl. кіруе Навуковая й акадэмічная кампутарныя сеткі (NASK). Апрача таго NASK займаецца таксама дасьледчыцкай і адукацыйнай дзейнасьцю ў галіне сеціва. У 1991 годзе гэта менавіта NASK наладзіў першае спалучэньне з сусьветным Інтэрнэтам з тэрыторыі Польшчы.
аз