Украіна пачала блякаду сэпаратысцкіх рэспублік

Украіна прыпыніла грузавыя перавозкі з кантраляванай прарасейскімі сэпаратыстамі часткай Данбасу. З такой прапановай зьвярнуўся да Рады нацыянальнай бясьпекі й абароны Пётр Парашэнка. Рада падтрымала прапанову ўкраінскага прэзыдэнта.

У апошні час грамадзкія актывісты часта незаконна блякавалі камунікацыйныя шляхі, што прыводзіла да збою ў гандлі з Данбасам. Паліцыя спрабавала разьбіць гэтыя блякады.

Паводле кіраўніка Рады нацыянальнай бясьпекі й абароны Аляксандра Турчынава, гэта, між іншым, адказ Украіны на прызнаньне Расеяй дакумэнтаў, якія выдаюць самаабвешчаныя ЛНР і ДНР. Турчынаў дадаў, што будуць перакрытыя ўсе дарогі й чыгуначныя шляхі, якія вядуць да лініі разьмежаваньня бакоў канфлікту. Прыпыненьне руху не датычыць паставак гуманітарнага грузу.

Нагадаем, з канца студзеня незаконную блякаду камунікацыйных шляхоў з сэпаратысцкімі рэгіёнамі арганізоўвалі грамадзкія актывісты і ўкраінскія вэтэраны баявых дзеяньняў у Данбасе. Перш за ўсё яны блякавалі чыгуначныя шляхі, па якіх ва Ўкраіну пастаўляўся вугаль з сэпаратысцкіх тэрыторый.

аз