„Нафтагаз” будзе судзіцца з Расеяй за страчаную на Крыме маёмасьць

Украінская дзяржаўная нафтавая кампанія „Нафтагаз” судзіцца з Расеяй за страчаныя на Крыме актывы. Украінскі бок падаў пазоў па гэтай справе ў Пастаянную палату трацейскага суда ў Гаазе. Украінцы патрабуюць кампэнсацыі.

„Нафтагаз” ацэньвае свае страты ў 5 мільярдаў даляраў ЗША. Такіх сродкаў у расейцаў патрабуе ўкраінская дзяржаўная кампанія й шэсьць ейных даччыных прадпрыемстваў за забраную на акупаванай паўвысьпе маёмасьць.

Гаворка ідзе, між іншым, пра радовішчы нафты й газу, падземныя сховішчы й трубаправоды. „Нафтагаз” чакае, што суд у Гаазе выдасьць рашэньне па гэтай справе да канца 2018 году.

„Нафтагаз”, гэта ня першая ўкраінская кампанія, якая ў міжнародным судзе патрабуе кампэнсацыі за ўласнасьць, забраную расейцамі на Крыме. Раней аналягічныя пазовы ў суд у Гаазе падалі, сярод іншага, „Укрнафта” й „ПриватБанк”.

аз