Канец мультыкультуралізму

„Трэба адмовіцца ад практыкі мультыкультуралізму. Імігранты з Каўказу – гэта пагроза,” - сьцьвердзіў Дзьмітры Рагозін, прадстаўнік Расеі пры NATO.

Паводле назіральнікаў, гэты здольны расейскі палітык па асабістай просьбе Ўладзімера Пуціна вяртаецца з Брусэля ў Расею, каб будаваць нацыяналістычнае крыло гэтак званага пуцінаўскага лягера, - чытаем на старонках выданьня „Rzeczpospolita”.

Падчас Сусьветнага палітычнага форуму ў Яраслаўлі расейскі амбасадар пры NATO прэзэнтаваў прапагандысцка-праграмную ідэю.

Рагозін пераконваў, што Расея, таксама як і Захад, падвяргаецца ціску з боку іміграцыі, а ідэя мультыкультуралізму выключна шкодзіць Эўропе.

„Нашая іміграцыя небясьпечная як у палітычным, гэтак і грамадзкім аспэктах,” - пераконваў Рагозін. У прыватнасьці, ён мае на ўвазе імігрантаў з Паўночнага Каўказу, якія „дэманстрацыйна парушаюць расейскія стандарты культуры”.

Паводле дыплямата, расейскі народ павінен дэнацыяналізавацца ды „адбудаваць інстынкт кіруючай нацыі, якая аб’яднае Расею”, - словы Рагозіна цытуе „Rzeczpospolita”.

аз