Дэпутаты ЭП заклікаюць памілаваць Канавалава й Кавалёва

Дэпутаты Эўрапарлямэнту заклікаюць Лукашэнку захаваць жыцьцё Дзьмітрыю Канавалаву і Ўладзіславу Кавалёву, а таксама ўвесьці мараторый на сьмяротнае пакараньне.

Чальцы падкамітэта па правох чалавека - дэпутатка ад Летувы Лайма Андрыкене й славацкі эўрадэпутат Эдуард Кукан у сумеснай заяве рашуча асудзілі пастанову Вярхоўнага суда Беларусі, які прыгаварыў Канавалава й Кавалёва да сьмерці.

„Віна гэтых двух маладых людзей не была даказана, і нават у сваякоў ахвяраў ёсьць сур'ёзныя сумневы, што гэтыя людзі віноўныя ў зьдзяйсьненьні гэтага злачынства ", заявілі дэпутаты, зазначыўшы, што існуе небясьпека прывядзеньня прысуду ў выкананьне без усялякага папярэджаньня.

Эўрадэпутаты зазначылі, што памілаваньне Канавалава й Кавалёва можа быць першым крокам на шляху палітычных рэформаў, пра якія нядаўна заяўляў Лукашэнка.

„Палітычныя рэформы павінны пачацца ад адмены сьмяротнага пакараньня і ўвядзеньня мараторыя на выкананьне сьмяротных прысудаў,” - падкрэсьлілі ў сумеснай заяве Лайма Андрыкене й Эдуард Кукан.

кр/eppgroup.eu