Прыкінуцца хворым – папулярны спосаб падмануць працадаўцу

Людзі, якія атрымліваюць звальненьне з працы па прычыне хваробы, вельмі часта выкарыстоўваюць яго не па прызначэньні – сьцьвярджаюць супрацоўнікі польскага дзяржаўнага Фонду сацыяльнага страхаваньня (Zakład Ubezpieczeń Społecznych – ZUS). Кур’ёзныя выпадкі апісвае Gazeta Wyborcza.

Фонд сацыяльнага страхаваньня ў Польшчы выплачвае працаўнікам грошы, калі яны сыходзяць на бальнічны. Таму працаўнікі фонду маюць права наведаць хворага й спраўдзіць, як ён выкарыстоўвае выдадзеныя яму адпачынак. У мінулым годзе працаўнікі сацыяльных службаў наведалі больш за 260 тысячаў чалавек. У 10 тысячах выпадкаў яны канстатавалі парушэньні.

Здаралася, што спартоўцы-аматары выкарыстоўвалі адпачынак, каб прыняць удзел у спаборніцтвах па валейболу і велагонках. Бывала, што кантралёры заставалі хворага на радыкуліт, калі тыя капаліся ў агародчыку ці разьвешвалі фіранкі. Некаторыя «хворыя» нават умудраліся адпраўляцца ў турыстычныя паездкі й пешыя паломніцтвы. Здараліся выпадкі, калі водпуск па прычыне хваробы выкарыстоўвалі, каб падзарабіць на выпадковай працы ці ў канкурэнтнай фірме.

Пасьля выкрыцьця парушэньня працаўнік павінен вярнуцца да сваіх абавязкаў, а часта й вярнуць фонду грошы. У мінулым годзе сума такіх выплат склала амаль 2 мільёны эўра. Яшчэ даражэй падаткаплацельшчыкам абыходзяцца «ліпавыя» даведкі, якія выдаюць лекары. Але гэта ўжо асобная тэма – піша Gazeta Wyborcza.

Gazeta Wyborcza/ап