Трэць маладых расейцаў хочуць пераехаць жыць за мяжу

Апошняе апытаньне ўрадавага цэнтра дасьледаванья грамадзкай думкі сьведчыць пра тое, што 31% расейцаў ва ўзросьце 18-24 гадоў хацелі б зьехаць за мяжу. Летась гэтая лічба складала 25. Прычыну росту расейскія аналітыкі бачаць у пагаршэньні эканамічнай сытуацыі ў краіне і ў агрэсіўнай палітыцы Крамля, якая абмяжоўвае грамадзянскія правы. Экспэрты зазначаюць, што ў Расеі адсутнічаюць шырокія магчымасьці прафэсійнай кар’еры.

«Кіраўнікі ўстаноў трымаюць пасады сваім дзецям, гэта тычыцца ўсіх органаў дзяржаўнай адміністрацыі. Паўсюль пашыраецца кумаўство», – кажа вядомы расейскі палітоляг Аляксей Макаркін.

«Дзяржаўныя СМІ ня ў стане запалохаць маладых расейцаў «варожым Захадам», бо яны не глядзяць тэлебачаньня - у іх свае крыніцы інфармацыі ў сеціве”-, зазначае палітоляг.

Паводле дадзеных МУС РФ, толькі 20% расейцаў маюць замежны пашпарт, а на замежны адпачынак могуць сабе дазволіць 10% грамадзян.

Rzeczpospolita/яс