«Газэта Слонімская» адзначыла выхад тысячнага нумару

«Газэта Слонімская» адзначыла выхад тысячнага нумару. Адно з буйнейшых недзяржаўных рэгіянальных выданьняў Беларусі карыстаецца вялікай папулярнасьцю сярод чытачоў і працягвае выходзіць, нягледзячы на перашкоды ўладаў.

Нават у тым, каб адзначыць юбілей, улады зрабілі «Газэце Слонімскай» праблему, бо не дазволілі правесьці рэклямную акцыю ў цэнтры горада. Журналістам прыйшлося арганізоўваць мерапрыемства ў прыватным двары.

Мы патэлефанавалі ў Слонім заснавальніку, уладальніку й галоўнаму рэдактару выданьня Віктару Валадашчуку й папрасілі распавесьці пра тое, як яму й калектыву працавалася цягам згаданых тысячы нумароў. Наш суразмоўца падкрэсьлівае, што ўлады ствараюць перашкоды ўсюды, дзе толькі могуць, і перш за ўсё эканамічныя.

Якое значэньне для жыхароў Слоніма й рэгіёну мае «Газэта Слонімская»? Пра гэта мы запыталіся ў вядомага слонімскага грамадзкага й палітычнага дзеяча ды вядомага ўрача-траўматоляга Івана Шэгі. Значэньне мае вялікае, бо гэта асноўная крыніца свабодных навін, кажа суразмоўца.

«Газэта Слонімская» ўпершыню выйшла ў 1938 годзе, узноўленая ў сёньняшнім фармаце ў 1997 годзе. Распаўсюджваецца ў Слоніме ды раёне, а таксама ў суседніх раёнах ды населеных пунктах.

Валеры Саўко

размова з В.Валадашчуком і І.Шэгам у далучаным гукавым файле