20 траўня мінулага году фрэгат «Дар моладзі» вырушыў у «Рэйс Незалежнасьці» з порта Гдыні. На сваім шляху вакол сьвету судна наведала 23 парты ў 18 краінах сьвету на 5 кантынэнтах, дзе рэклямавала Польшчу ды 100 год аднаўленьня незалежнасьці краіны. Камандай на караблі агулам пабывала больш за 1000 чалавек.
28 сакавіка каля 11 гадзіны карабель вярнуўся ў порт Гдыні. На пірсе адбылося ўрачыстае павітаньне з удзелам прадстаўнікоў улады, спонсараў ды ўсіх сябраў каманды.
Адным з арганізатараў Рэйсу выступіў Фонд Палатынскай місіі Сальваці. Прадстаўніца фонду Моніка Мастоўска заявіла, што арганізацыя рэйсу было складаным заданьнем, але завяршылася пасьпяхова
Моніка Мастоўска: Гэты дзень – кульмінацыя, якая пачнецца надзвычай важнай урачыстасьцю – афіцыйным прывітаньнем. Увечары адбудзецца ўрачысты галя-канцэрт з падсумаваньнем усіх аспэктаў рэйсу: дыпляматычнага, культурнага ды місіі. У кожным абшары рэйс быў вельмі цікавым праектам, які зьмяніў сэрцы моладзі, якая праплыла «Дарам моладзі».
Рэйс «Дару моладзі» стаў заўважальнай акцыяй прасоўваньня і папулярызацыі Польшчы ў сьвеце. Такая ацэнка прагучала з вуснай прадстаўніцы спонсарскай арганізацыі – канцэрна Orlen Кінгі Фэдароўскай з прэсавай службы фірмы.
Кінга Фэдароўска: На маю думку, гэта была вельмі добрая інвэстыцыя. Наш лягатып на белых ветразях прыгожага польскага фрэгата «Дар моладзі», які праплыў навокал сьвету за год. Заплыў у 23 парты, папулярызацыя краіны. Варта падтрымліваць такія ініцыятывы. Мы мусім ганарыцца нашай гісторыяй ды культурай, нашай тоеснасьцю. Рэйс Незалежнасьці – гэта вельмі добрая форма папулярызацыі гэтых каштоўнасьцяў.
У сваю чаргу міністар марской гаспадаркі ды мараплаваньня Польшчы Марэк Грубарчык зазначыў падчас павітальнай урачыстасьці, што рэйс «Дару моладзі» – гэта ня толькі рэкляма Польшчы ў сьвеце, але й спрыяньне разьвіцьцю польскага сэктара марской эканомікі.
Марэк Грубарчык: Гэтая задума павінна была быць рэалізаваная для Польшчы і будучых пакаленьняў. Таксама гэта важна для марскога сэктара эканомікі. Таксама гэта мела важны ўплыў на падкрэсьленьне нашай ролі ў сьвеце, пра нашыя пляны. Цяпер марскі сэктар разьвіваецца, паказьнікі растуць. Гэты сэктар павінен стаць адным з прывадных рамянёў нашай эканомікі.
Вярнуўшыся карабель віталі жыхары Гдыні, для якіх «Дар моладзі» мае вельмі істотнае значэньне. Сотні людзей прыйшлі на ўзьбярэжжа, каб зноў убачыць бела фрэгат.
Жыхарка: Вельмі прыемнае пачуцьцё, тым больш, што я была разьвітаньні з караблём. Я моцна прывязаная да мора, жыву ў Гдыні ад нараджэньня. Сёньня я вельмі рада ўбачыць зноў судна ў Гдыні, бракавала яго. Была пустое месца.
Жыхар: «Дар моладзі» – візытка, сымбаль горада. Зразумела, што карабель ня можа толькі стаяць у порце. Ён павінен плаваць, і думаю, што доўга ў порце не пастаіць.
Урачыстасьці, зьвязаныя з завяршэньнем «Рэйсу незалежнасьці» будуць доўжыцца ўвесь чацьвер. Пасьля ўрачыстага павітаньня карабля, а 15 прайшла ўрачыстая служба ў касьцёле. Увечары гарадзкія ўлады ладзяць пікнік, галя-канцэрт з падсумаваньне «Рэйса Незалежнасьці».
Юры Ліхтаровіч