Фота: uznayvse.ru
Кожны трэці паляк ніколі ня быў у акуліста ды амаль нічога ня ведае пра захворваньні вачэй. Пра гэта гаворыцца ў справаздачы, апублікаванай з нагоды Тыдня захворваньняў сятчаткі вачэй.
Старшыня Асацыяцыі ўзроставай макулярнай дэгенэрацыі сятчаткі вачэй прафэсар Анджэй Станкевіч падкрэсьлівае, што недыягназаваныя й нялечаныя захворваньні сятчаткі могуць прывесьці да сьлепаты.
Анджэй Станкевіч: Захворваньні сятчаткі, асабліва ўзроставая макулярная дэгенэрацыя сятчаткі, цягам некалькіх месяцаў могуць давесьці да сур’ёзных праблем са зрокам ды нават сьлепаты. Гэтыя хваробы можна лячыць. Аднак, каб лячэньне было пасьпяховым, па-першае, хваробу трэба дыягназаваць на раньнім этапе. Гэта значыць, што пацыент спачатку павінен прыйсьці да лекара.
Прафэсар Станкевіч шкадуе, што лечыцца толькі 10% пацыентаў, у якіх заўважаюцца захворваньні сятчаткі.
Анджэй Станкевіч: 90% чалавек не пачынае тэрапіі. Па-першае, яны не наведваюць лекара. Па-другое, прыходзяць на этапе хваробы ў апошняй стадыі. Па-трэцяе, візыта ў лекара яны чакаюць некалькі месяцаў. Тым часам, напрыклад, узроставая макулярная дэгенэрацыя сятчаткі за некалькі месяцаў можа давесьці да сьлепаты.
- папярэджвае прафэсар Анджэй Станкевіч.
Старшыня Асацыяцыі „Retina AMD Polska”, Малгажата Пахолец падкрэсьлівае, што ў выпадку захворваньняў вачэй найважнейшымі зьяўляюцца прафілактычныя дасьледаваньні.
Малгажата Пахолец: Хваробы вачэй, на шчасьце, а можа на жаль, амаль ня выклікаюць болі. Гэта не адбываецца так, што мы трацім зрок у адзін дзень. Гэтыя захворваньні разьвіваюцца цягам тыдняў і месяцаў. На канец, калі мы арыентуемся, што наш зрок вельмі пагоршыўся, часта на лячэньне ўжо запозна.
- кажа Малгажата Пахолец.
Справаздача пад назвай „Спыніць эпідэмію сьлепаты. Мэдыцынскі, сацыяльны й эканамічны аспэкты захворваньня сятчаткі" была апрацаваная на падставе дасьледаваньня тысячы палякаў.
аз