Эўрапарлямэнт ратыфікаваў пагадненьне аб асацыяцыі з Малдовай

Эўрапарлямэнт ратыфікаваў пагадненьне аб асацыяцыі з Рэспублікай Малдова. Гэта жэст прызнаньня рэформаў, якія Малдова ажыцьцяўляе на сваім шляху ў Эўразьвяз.

Летувіскі дэпутат Пятрас Аўштрэвічус - аўтар дакладу па Малдове - лічыць, што ратыфікацыя пагадненьня – гэта кульмінацыя дзеяньняў, якія Малдова прадпрымала цягам апошніх 10 гадоў.

„Сёньня пачынаецца новая эўрапейская будучыня Малдовы й ейных грамадзянаў. Будучыня, якая заўсёды была Малдове наканаваная. Няма ніякіх сумневаў, што гэта эўрапейская краіна й частка эўрапейскай культуры. Малдова заслугоўвае гэты гістарычны крок”, - сказаў летувіскі эўрадэпутат.

Ён дадаў, што набліжэньне Малдовы й Эўразьвязу не зьяўляецца ніякай пагрозай для эканамічных і палітычных інтарэсаў Расеі.

Ратыфікацыя пагадненьня ў Эўрапарлямэнце адбылася незадоўга да парлямэнцкіх выбараў, якія пройдуць у Малдове 30 лістапада.

„У будучыні ЭЗ гатовы працягваць супрацу з дэмакратычна абраным урадам”, - сказаў новы камісар ЭЗ па справах палітыкі добрасуседзтва Ёханэс Хан. Ён дадаў, што менавіта ў Кішынёў ён плянуе накіравацца са сваім першым афіцыйным візытам.

аз