Беларусь паставіла ў РФ у 5 разоў больш яблыкаў, чым вырасьціла

Беларусь у 2015 годзе экспартавала ў Расею 573 тыс. тон яблыкаў і грыбоў, што ў пяць разоў перавышае сабраны ў краіне ўраджай. Пра гэта паведаміў намесьнік генпракурора РФ Уладзімір Маліноўскі на паседжаньні аб'яднанай калегіі Генэральных пракуратур Расеі й Беларусі

„Забароненыя да ўвозу ў Расеі тавары нярэдка пастаўляюцца па падробленых таварасуправаджальных і фітасанітарных дакумэнтах. Так, напрыклад, у 2015 годзе ў Расею экспартавана 573 тыс. тон беларускіх яблыкаў і грыбоў. Па дадзеных Мінсельгаса Беларусі, гэта ў пяць разоў перавышае сабраны ўраджай”, - сказаў Маліноўскі.

Сытуацыю, паводле яго слоў, пагаршае тое, што на мяжы Расеі й Беларусі не праводзіцца фітасанітарны кантроль увозімых тавараў.

Паседжаньне аб'яднанай калегіі генпракуратур дзьвюх краін было прысьвечана пытаньням арганізацыі ўзаемадзеяньня праваахоўных органаў Саюзнай дзяржавы й павышэньня эфэктыўнасьці пракурорскага нагляду ў сфэры барацьбы з мытнымі злачынствамі.

tass.ru/nn.by/аз