Аўстрыйскі канцлер казаў у Менску пра дэфіцыт свабоды слова

Пытаньне аб «дэфіцыце свабоды слова» ў Беларусі ўзьняў канцлер Аўстрыі Себасьцьян Курц на сустрэчы з Аляксандрам Лукашэнкам 29 сакавіка ў Менску.

У цэнтры ўвагі былі таксама іншыя тэмы, якія тычацца правоў чалавека, адзначаецца ў прэс-рэлізе, разьмешчаным на сайце кіраўніка аўстрыйскага ўраду.
«Уцягваньне Беларусі ва Ўсходняе партнэрства Эўразьвязу патрэбна для паскарэньня неабходных рэформаў», – заявіў Курц. Пры гэтым, паводле яго слоў, ад Беларусі ня трэба патрабаваць рабіць выбар паміж Расеяй і Эўропай, а хутчэй, прапанаваць канцэпцыю «і, і», у якой вялікае значэньне мае паглыбленьне супрацоўніцтва ў рамках Усходняга партнэрства.

На сваёй старонцы ў «Твітэры» канцлер напісаў: «З прэзыдэнтам Лукашэнкам я абмеркаваў таксама тэмы, дзе мы іншага меркаваньня: вяршэнства права і правы чалавека, пры гэтым мы робім стаўку на дыялёг па правах чалавека, які вядзе Эўразьвяз».

Адбылося пяць раўндаў двухбаковага дыялёгу, які Эўрасаюз праводзіць на індывідуальнай аснове больш чым з 30 краінамі.

паводле Радыё Свабода/нг