Беларусь просіць Расію адтэрмінаваць крэдыт на БелАЭС

Беларусь і Расія абмяркоўваюць магчымасьць адтэрмінаваньня расійскага крэдыту на будаўніцтва Беларускай атамнай электрастанцыі ў Астраўцы. Пра гэта 4 красавіка распавёў журналістам кіраўнік Белэнэрга Віктар Каранкевіч

Прапановы беларускага боку датычацца як павелічэньня тэрміну крэдыту – з 25 да 35 гадоў, так і зьніжэньня працэнтнай стаўкі.

Крэдыт на будаўніцтва АЭС быў выдзелены ў памеры 10 мільярдаў даляраў у рамках міжурадавага пагадненьня. Меркавалася, што гэтыя сродкі павінны пакрыць 90% выдаткаў на будаўніцтва станцыі. Астатнія 10% аплачвае Беларусь.

Пагашэньне асноўнага доўгу пачынаецца пасьля ўводу АЭС у эксплёатацыю. Першы энэргаблёк плянуецца ўвесьці ў эксплёатацыю ў 2019 годзе, другі – у 2020 годзе.

У сакавіку пасол Расіі ў Мінску Міхаіл Бабіч заявіў, што расійскі бок у цяперашніх эканамічных умовах не бачыць неабходнасьці ў пераглядзе ўмоў выдачы гэтага крэдыту.

Паводле Nasa Niva/юл