З 2020 г.у Польшчы можа моцна падаражэць вываз сьмецьця

Прадпрымальнікі і мясцовыя ўлады б’юць трывогу, што з 2020 году ў Польшчы моцна падаражэе вываз сьмецьця, а ў многіх гарадах і мястэчках будзе брудна. Чаму?

Справа зьвязаная з жорсткім законам аб электрамабільнасьці і альтэрнатыўных палівах. Паводле правіл, неўзабаве ўсе прадпрыемствы, якія займаюцца ачысткай горада, мусяць увесьці 10% электрычных аўтамабіляў. Сьмецьцявозы, сьнегаачышчальнікі, іншая тэхніка мусяць быць электрычныя, каб зьберагаць чыстае паветра. Польшча хацела быць у лідарах па гэтым пытаньні і таму прыняла такі закон.

Аднак прадпрымальнікі кажуць, што гэта нерэальна па дзьвюх прычынах: па-першае, такіх аўтамабіляў яшчэ няма – ствараюцца толькі прататыпы, а па-другое, яны каштуюць страшна дорага – калі сьмецьцявоз на дызельнае паліва каштуе 600 тысяч злотых, то электрычны – 3 млн злотых.

Дэпутаты ўжо зьвярнуліся да міністра энэргіі з прапановай дазволіць ня толькі электрычны прывад, а таксама транспарт на прыродны газ, або на вадарод.

Міністэрства энэргіі супакойвае, што прыслухаецца да прапановаў.

Rzeczpospolita/яс