Грэцыю затапіў дождж і засыпаў сьнег

Праліўныя дажджы й град, якія прайшлі ў апошнія дні ў Грэцыі, сталі прычынай вялікіх матэрыяльных стратаў. Надзвычайнае становішча будзе ўведзена таксама на высьпе Лесбас.

На папулярным турыстычным востраве Закінтас былі затопленыя многія дарогі, турыстычныя раёны й сельскагаспадарчыя ўгодзьдзі. Вада трапіла таксама ў некаторыя жылыя будынкі і гасьцініцы. З панядзелка зачыненыя школы.

Лівень нанёс вялікія страты таксама ў некаторых раёнах выспы Крыт: былі зьнішчаны многія сельскагаспадарчыя культуры, асабліва аліўкавыя дрэвы.

Затопленыя таксама некаторыя лягеры для мігрантаў у паўночнай Грэцыі. Асабліва ў цяжкім становішчы бежанцы, якія жывуць у палатках.

У сваю чаргу з-за першага сьнегу, які выпаў у апошні дзень у паўночнай і цэнтральнай Грэцыі, сёньня зачыненыя некаторыя школы. У некаторых месцах, у асноўным у раёне горада Салонікі, кіроўцы павінны накладваць ланцугі на колы.

яс